माओवादी केन्द्रको अगुवाइमा हेर्ने कथाका पात्र प्रकाश तामाङको घर निर्माण सुरु

भोजपुर। युट्युब च्यानल ‘हेर्ने कथा’ को ‘हराएका वर्षहरु’ का पात्र प्रकाश तामाङका लागि घर निर्माण थालिएको छ। प्रकाशको घर बनाउन शिलान्यास गरिएसँगै निर्माण सुरु भएको हो।

भोजपुरको षडानन्द नगरपालिका–१० साम्पाङमा प्रकाशका लागि निर्माण गर्न लागिएको घरको बुधबार शिलान्यास गरिएको थियो। पूर्वमन्त्री एवं सांसद सुदन किराती र भूतपूर्व गोर्खा सैनिक संघ (गेसो)का अध्यक्ष कृष्णकुमार राईसँगै प्रकाशका बुबाआमाले संयुक्तरुपमा नयाँ बन्ने घरको शिलान्यास गरेका थिए।

गेसोका अध्यक्ष राईले आफ्नो पूख्र्यौली सात रोपनी जग्गा प्रकाशलाई घर निर्माण गर्न दिएका छन्। करिब रु १५ लाख मूल्य बराबरको जग्गामा प्रकाशका लागि नेकपा (माओवादी केन्द्र)को अगुवाइमा घर बन्न लागेको हो। उपलब्ध गराइएको जग्गामा माओवादी केन्द्र षडानन्द नगर कमिटीको अगुवाइमा पाँच कोठे घर निर्माण गरिने छ।