घण्टी बजाएर रास्वपाले सुरु गर्‍यो केन्द्रीय परिषद्को राष्ट्रिय भेला

असोज १, काठमाडौँ । राष्ट्रिय स्वतन्त्र पार्टी रास्वपाको केन्द्रीय परिषद्को राष्ट्रिय भेला आजबाट सुरू भएको छ ।
राष्ट्रिय भेलाको शुभारम्भ पार्टी सभापति रवि लामिछानेले घण्टी बजाएर गरेका हुन् । उद्घाटन अघि प्रज्ञाभवनमा सामूहिक विश्वकर्मा पूजासमेत गरिएको हो ।

आज र भोलि काठमाडौंको प्रज्ञाभवन कमलादीमा हुने भेलामा देशभरबाट एक हजार ५०० प्रतिनिधि सहभागी हुने जनाइएको छ । पार्टी सचिवालयका अनुसार आज विभिन्न प्रतिवेदन र प्रस्तावमा छलफल हुनेछ । आज पहिलो दिन सबै प्रदेशले रिपोर्टिङ गरेपछि आर्थिक, अनुशासन र संसदीय मामिलासँग सम्बन्धित प्रतिवेदन पेस गरिनेछ ।

भोलि प्रस्तुत सबै प्रतिवेदन र प्रस्तावउपर समूहगत छलफल हुनेछ । भोलि नै प्रश्नोत्तरका लागि तीन घण्टा समय छुट्याइएको छ भने अपराह्न सभापति लामिछानेले राजनीतिक प्रतिवेदन प्रस्तुत गर्नेछन् । सबै प्रतिवेदन र प्रस्ताव पारित गरेपछि पहिलो महाधिवेशनको मिति र स्थान घोषणा गर्दै भेला भोलि नै सकिनेछ ।