काठमाडौँ जाँदै गरेको ट्रक त्रिशूलीमा खस्यो, उद्धारको काम हुँदै

मंसिर ४, काठमाडौँ । पृथ्वीराजमार्गअन्तर्गत धादिङको बेनीघाटमा एउटा ट्रक त्रिशूली नदीमा खसेको छ ।

नवलपरासीबाट काठमाडौं आउँदै गरेको लु २ ख २५० नम्बरको ट्रक आज बिहान रोराङ गाउँपालिका १० खयरघारीबाट त्रिशूलीमा खसेको जिल्ला प्रहरी कार्यालय धादिङका प्रहरी निरीक्षक प्रह्लाद सिलवालले जानकारी दिए ।

उनका अनुसार बिहान ६ बजेतिर उक्त ट्रक त्रिशुलीमा खसेको हो । दुर्घटनास्थल धादिङ र चितवनको सिमानामा पर्ने हुग्दीखोला नजिकै पर्दछ ।
दुर्घटनास्थलबाट ट्रक चालक नवलपरासी पश्चिमका २७ वर्षीय आशिष महतो, सहचालक २६ वर्षीय राजु थापामगर र ट्रक धनी खैरहनी नगरपालिका ४६ वर्षीय सुरेश गुरुङलाई प्रहरीले उद्धार गरिएको उनले बताए । उनीहरूलाई प्रारम्भिक उपचारका लागि मझिमटारस्थित बिहानी फार्मेसीमा पठाइएको छ ।ट्रक आफैं अनियन्त्रित भई दुर्घटना भएको प्रहरीको भनाइ छ ।