एनपीएल क्रिकेट : कर्णाली याक्सको तेस्रो जित, पोखराको तेस्रो हार

मंसिर २५, काठमाडौँ । नेपाल प्रिमियर लिग एनपीएल क्रिकेटमा कर्णाली याक्सले पोखरा एभेन्जर्सलाई सात विकेटले पराजित गरेको छ । कर्णाली याक्सको यो तेस्रो जित हो भने पोखराको तेस्रो हार हो । पोखराले दिएको १०४ रनको लक्ष्य पछ्याएको कर्णालीले १५ ओभरमा तीन विकेट भेट्टायो ।

कर्णालीका लागि सबैभन्दा धेरै गुल्सन झाले अविजित ४९ रन बनाए र यस्तै चाडविक वाल्टनले ४२ रन बनाए । पोखराका विपिन कार्की र सागर ढकालले समान एक विकेट लिए । त्यसअघि त्रिवि क्रिकेट मैदानमा टस जितेर ब्याटिङ गरेको पोखरा १६ ओभर तीन बलमा १०३ रनमा अलआउट भयो । पोखराका दिनेश खरेलले सबैभन्दा धेरै २६ रन बनाए । कर्णालीका विलियम बोसिस्टोले छ विकेट लिए ।

यस्तै कप्तान सोमपाल कामी, विपिन शर्मा र युनिस ठकुरीले समान एक विकेट लिए । आजको जीतसँगै कर्णाली पाँच खेलमा छ अङ्कसहित चौंथो स्थानमा छ भने चार खेलमा पोखरा छैटौं स्थानमा छ । नेपाल प्रिमियर लिग एनपीएलमा भोलि बिहान नौ बजे जनकपुर बोल्ट्स र सुदूरपश्चिम रोयल्स तथा दिउँसो एक बजे काठमाडौं गुर्खाज र लुम्बिनी लायन्सबीच खेल हुनेछ ।