प्रधानमन्त्री ओलीबाट एनपीएलको ट्रफी अनावरण

मंसिर १०, काठमाडौँ । नेपाल प्रिमियर लिग एनपीएलको ट्रफी अनावरण भएको छ ।

नेपाल क्रिकेट संघ क्यानद्वारा आयोजित एक कार्यक्रममा आज बिहान प्रधानमन्त्री केपी शर्मा ओली र सहभागी ८ टिमका मार्की खेलाडीहरुले सुन्धारास्थित धरहरा परिसरबाट एनपीएलको ट्रफी अनावरण गरेका हुन् । एनपीएलको ट्रफीमा कालापत्थरबाट ल्याइएको ढुंगा समावेश भएकाले विशेष मानिएको छ । ट्रफी अनावरण गर्दै प्रधानमन्त्री ओलीले नेपाली क्रिकेटका लागि आजको दिन महत्वपूर्ण रहेको बताए । उनले एनपीएलमा सहभागी सबै टिमलाई आफ्नो समर्थन रहेको बताउँदै सबैलाई शुभकामना दिए ।

प्रधानमन्त्री ओलीले एनपीएलले देशमा पर्यटन प्रवर्द्धन गर्ने पनि विश्वास व्यक्त गरे । उनले सरकारले खेलकुद क्षेत्रलाई जति प्रोत्साहन गर्नुपर्ने हो र जति सहयोग गर्नुपर्ने हो त्यति गर्न नसकेको पनि बताए ।