हेटौंडा–१२ मा एमालेका राजेश नगरकोटीको उम्मेदवारी

मकवानपुर । हेटौँडा उपमहानगरपालिका–१२ को वडाअध्यक्ष पदमा सत्तारुढ नेकपा एमालेका राजेश नगरकोटीले उम्मेदवारी दर्ता गराएका छन् । आउँदो मंसिर १६ गते हुने उपनिर्वाचनका लागि वडाअध्यक्ष पदमा नगरकोटीले आफ्नो उम्मेदवारी दर्ता गराएका हुन् ।

एमालेका नेता अर्जुनप्रसाद अर्याललाई समर्थक तथा बखान सिंह घलानलाई प्रतास्वक राखेर नगरकोटीले उम्मेदवारी दर्ता गराएका हुन् । २०७९ को स्थानीय तह निर्वाचनमा यो वडामा माओवादी केन्द्रले जितेको थियो । उक्त चुनावमा समेत उम्मेदवार रहेका नगरकोटी उपनिर्वाचनमा पनि चुनावी मैदानमा होमिएका हुन् । गत स्थानीय तह निर्वाचनमा उनले १,३२५ मत ल्याएका थिए ।

उक्त निर्वाचनमा कांग्रेसका अर्जुन तिवारीले १,३४० मत ल्याएर दोस्रो भएका थिए । नेकपा माओवादी केन्द्रका ललितबहादुर घलानले १,३७१ मत ल्याउँदै बिजयी भएका थिए । गत निर्वाचनमा झिनो मतान्तरले तेस्रो हुँदै पराजय भोगेका नगरकोटीलाई नै नेकपा एमालेले उपनिर्वाचनमा पनि अवसर दिएको हो ।